Huling Gabi

maliwanag na buwan at di mabilang na mga bituin,
malamyong hangin na bumabalot sa paligid natin.
pagaspas ng mga dahon o anong sarap dinggin,
sarap sa pakiramdam ng damuhang hinihigaan natin.

wala ng hihigit pa sa nadarama ko ngayon sinta,
hawak ko ang iyong kamay habang nakatingin sa iyong mga mata.
tinig mo na tila awitin sa aking pandinig,
binibigkas lahat ng mga salitang nais ko lamang marinig.

o anong tamis ng ngiti sa iyong mga labi,
nakukuha nitong pawiin lahat ng aking pighati.
mga yakap mo sa aking bisig na walang kasing higpit,
nagpapahiwatig na sana’y lagi tayong magkalapit.

sa mga sandaling ito na ikaw ay aking katabi,
sa ilalim ng buwan at malalim na gabi,
o diyos ko bigyan mo po ako kahit konti pang sandali,
iwanan siya ay kahit kailan hindi ko naging gawi.

huwag kang magalala pinakamamahal kong sinta,
pagkat wala tayong ibang iisipin ngayon kundi tayong dalawa.
magkakalayo man tayo sa oras ng bukang liwayway,
wala akong ibang patutunguhan, sa puso mo ako’y mahihimlay.

at sa huling sandaling ito nais ko sa iyong ipadama,
mahal kita. ikaw lang, at wala ng iba.
balang araw magkikita tayong muli aking sinta,
pangako, pangakong hihintayin kita.